O ferreiro, un brazo máis de labregos e artesáns.

O vindeiro venres, 29 de maio, ás 8 e media, na Casa da Cultura de Lérez e dentro dos Venres Culturais de CEDOFEITA, Antonio Vázquez achegarános ao mundo do traballo do ferro. Entrada de balde ata completar o aforo.

Actividades en abril

Venres Culturais CEDOFEITA

A Asociación Sociocultural CEDOFEITA de Lérez comprácese en convidar a vostede á conferencia

”Campanarios: arquitectura e funcións”

que pronunciará

Benigno García Casalderrey

• Venres, 24 de abril, de 2015, ás 20.30 h.
• Casa da Cultura de Lérez.

A Asociación Sociocultural Cedofeita de Lérez

comprácese en convidar a vostede ó

“Roteiro do Lérez ó Rons”

Domingo, 26 de abril de 2015.

Saída: ás 9,30 h.do mosteiro de Lérez.

- Distancia estimada, 10 km. Duración aproximada, 4 h. Dificultade media.

- Os asistentes virán provistos de calzado e roupa axeitados.

Nova directiva e actividades para 2015

A asociación Cedofeita na última asemblea aprobou o programa de actividades para 2015 e renovou a composición da directiva: Xosé Álvarez deixa a presidencia resultando elixido novo presidente Xaime Iglesias e prodúcense novas incorporacións como se detalla máis adiante.

Programa de actividades. 2015

• Venres Culturais (charlas, actuacións musicais, coloquios, proxeccións...). Todos os últimos venres de mes (agás puntuais excepcións), de outubro a abril/maio, ás 20,30 h., na Casa da Cultura. Están programados os seguintes:

• 27 de marzo. Charla de Mercedes Torres Hermida

“Chamadeiros: nomes dos lugares dos arredores de Pontevedra”.

• 24 de abril. Charla de Benigno García Casalderrey

“Campanarios: arquitectura e funcións”

• 29 de maio. Charla de Antonio Vázquez Iglesias

“O ferreiro, un brazo máis de labregos e artesáns”

Os “Venres Culturais” seguintes daranse a coñecer oportunamente.

• Roteiro. Domingo, 26 de abril. “Do Lérez ó Rons”. Saída ás 9, 30 h. do mosteiro de Lérez. Dificultade media. Duración aproximada 4 h. Observaremos aspectos xeográficos, paisaxísticos e etnográficos.

• Concerto-Baile. Sábado, 6 de xuño, a partir das 21,30 h. “A música na miña vida” a cargo de Manolo Canosa. Entrada libre ata completar aforo.

• Viaxe cultural. Domingo, 14 de xuño. Saída do mosteiro de Lérez, ás 08,30 h

Visitarase a zona de Castro Caldelas, Trives, A Rúa, O Bolo. Observaremos aspectos de interese paisaxístico, monumental, cultural, etc.

O prezo por persoa será o resultado de dividir os gastos (transporte e xantar) entre os asistentes. As prazas serán adxudicadas por orde de inscrición. Para reservar debe contactarse con calquera dos membros da directiva antes do día 31 de maio.

• Exposición. Terá lugar os primeiros días de agosto. O tema deste ano é medios de locomoción e transporte relacionados con Lérez.

Solicitamos a colaboración dos socios, en especial, na localización de fotografías:

• fotografías de todo tipo de vehículos de xente de Lérez: carretas, remolques de man, carros de vacas, tractores, chimpins, bicicletas, motos, isocarros, coches, camións, podendo ser con carga e/ou coas persoas propietarias ou usuarias.
• Fotografías de persoas de Lérez nun autobús, no tren, nun avión, nun barco...
• Fotografías de animais de tiro e/ou carga como burro, cabalo… mellor con carga e/ou cos seus propietario/usuarios.
• Fotografías de persoas cargadas con cestos, feixes, sacos…, ó lombo, na cabeza…
• Calquera outra fotografía ou obxecto relacionado con este tema.

Nota, As fotografías que se faciliten devolveranse despois de facerlles unha copia.

• Feira Franca. Como vén sendo habitual, Cedofeita participará na Feira Franca, este ano cun obradoiro de elaboración de papel a partir de palla.

• Actividades micolóxicas. Charla sobre cogomelos e saída de campo. As datas (en outubro ou novembro) fixaranse dependendo das condicións do tempo.

• Publicación do nº 19 da revista CEDOFEITA.

Convidamos a todos os socios/as a colaborar na revista con artigos. O equipo redactor está á vosa disposición para prestar calquera tipo de axuda técnica (documental, fotográfica, lingüística...).Os traballos deberán enviarse antes do 31 de xullo.

• Presentacion da revista farase no mes de setembro no lugar e data que se dará a coñecer oportunamente.

NOTAS:

• A Asociación CEDOFEITA, como entidade aberta e plural, convida a todos os seus asociados/as a participar nas actividades programadas.
• Ademais, agradece as vosas suxestións para a organización destes e outros actos, así como para a posible formación de grupos de traballo sobre diversos temas (teatro, toponimia, historia, patrimonio, medio ambiente…)
• Dispoñemos de revistas sobrantes desde o número 1 ó 18. Se algún socio/a necesita algunha, pode solicitala á xunta directiva. Reservarase certa cantidade de cada número para o arquivo e o resto entregaranse por orde de petición ata esgotarse.
• Rogamos a todas as socias e socios que dispoñan de correo electrónico nolo fagan chegar para axilizar e abaratar os comunicados relacionados coa asociación. Para este fin deberán enviar un correo electrónico a acedofeita@yahoo.es, indicando no texto nome, dous apelidos e DNI. Se houbese algún cambio nalgún dato (domicilio, teléfono, IBAN bancario, etc,) podedes aproveitar para comunicalo.
• Para calquera dos asuntos mencionados (viaxe cultural, fotografías para a exposición, , artigos para a revista, suxestións, etc.), así como para calquera proposta, podedes contactar coa asociación por medio do correo electrónico antes citado, nos teléfonos

986 87 12 52 (Jaime), 986 87 13 03 (Benigno), 636 29 98 05 (X. Luís Solla), 986 87 15 69 (Pepe) ou persoalmente con calquera membro da Xunta Directiva.

Composición da Xunta directiva

• Presidente: Jaime Iglesias González
• Vivcepresidente: Benigno García Casalderrey
• Secretario: José Luís Estévez Solla.
• Tesoureiro: José Manuel Castro Méndez
• Vogais: Xosé Álvarez Castro

Jaime Barreiro Montes

Eva Cochón Moledo

Mª José Donsión Couselo

José Grandal Sanjorge

José Quinteiro Piñeiro

Mª Dolores Tobío Iglesias

Antonio Vázquez Iglesias

Asemblea xeral e Venres Cultural

A Casa da Cultura de Lérez será o escenario da conferencia "Feísmo: enfermidade ou síntoma?” que pronunciará o antropólogo e xornalista Germán Ermida

Continuando coa programación dos xa habituais “Venres Culturais Cedofeita”, a Casa da Cultura de Lérez será o escenario da conferencia "Feísmo: enfermidade ou síntoma?” que pronunciará o antropólogo e xornalista Germán Ermida. Será o próximo venres, día 27 do presente mes, ás 20,30 h.

Desde hai quince anos, Germán Ermida vén desempeñando tarefas de redactor en Culturagalega.org, prestando unha especial atención aos campos da música, o asociacionismo cultural, o patrimonio, a banda deseñada e a literatura. En paralelo, desenvolve unha intensa tarefa no campo asociativo en diferentes entidades. Desde hai máis de vinte anos e ten colaborado en publicacións como "Tempos novos". "Novas da Galiza", "Sermos Galiza", "BD Banda", "Boletín galego de literatura" e "Adra". Tamén ten participado en charlas e mesas redondas sobre diversas cuestións.

Ademais. na actualidade mantén o blog http://donatural.blogaliza.org,onde reflexiona sobre diferentes cuestións vencelladas á identidade e ao patrimonio cultural. 

Na conferencia que impartirá na Casa da Cultura de Lérez, Germán Ermida tentará, con máis preguntas que respostas, abordar a complexa problemática do que se deu en chamar feísmo, termo aínda sen perfilar, que pode referirse a aquelas construcións e realizacións humanas caracterizadas por un alto grao de mediocridade.

Hoxe en día, os medios de comunicación e a propia administración presentan o feísmo como un problema urxente para a sociedade galega. No entanto, detrás desta idea existe toda unha serie de preconceptos, relacións de poder e cuestións sociais que non sempre resultan evidentes e que Germán Ermida pretende esclarecer formulando interrogantes como, até que punto o feísmo existe ou simplemente se quere ver? Quen determina o que é feo? E, detrás da uralita e do tixolo à vista, non haberá outros problemas máis graves? A conferencia irá acompañada de exemplos gráficos sobre os que debater estas e outras cuestións.

Para o próximo mes de marzo a programación de “Venres Culturais Cedofeita” ofrecerá a conferencia de Mercedes Torres sobre toponimia dos arredores de Pontevedra. Tamén terá lugar na casa da Cultura de Lérez, o venres, día 27, ás 20,30 h. Coma sempre, a entrada será de balde ata completar aforo.

Asemblea Xeral Ordinaria

Data: xoves, 12 de marzo de 2015.

Lugar: Local social. Casa da Cultura. R/ Leandro del Río 12

Hora: 9 da noite.(en 2ª e definitiva convocatoria)

Orde do día:

1.º Lectura da acta da sesión anterior e aprobación, se procede.

2ª Memoria de actividades realizadas.

3º Plano anual de actividades para 2015.

4º Estado de contas e orzamento para o próximo exercicio.

5º Rogos e preguntas.

Asemblea Xeral Extraordinaria

A continuación da asemblea sinalada anteriormente, terá lugar Asemblea Xeral Extraordinaria coa seguinte :

Orde do día:

Punto único: Elección de Xunta Directiva.

Nota: As candidaturas para Xunta Directiva poderán presentarse ata unha hora antes da hora de comezo da Asemblea Ordinaria ( 8 da noite) no local social ou dirixíndose ao secretario.

Concerto en Lérez

Concerto da coral “Voces Amigas” de Mourente

na Casa da Cultura de Lérez

O próximo venres, 30 de xaneiro, ás 20,30 h., a coral “Voces Amigas” de Mourente dará un concerto na Casa da Cultura de Lérez, dentro da programación dos xa habituais “Venres Culturais Cedofeita”.

Esta coral, aínda que se rexistrou no ano 2011, xa comezara a súa andaina anos antes, sendo a súa presentación en agosto de 2009, no local de Sociedade Cultural Deportiva de Mourente, con motivo do cincuenta aniversario desta entidade. Naquela actuación, estrearon a creación propia “Mourente bendita terra”, que foi a admiración dos asistentes.

Dentro das súas moitas actuacións, cabe destacar as que vén realizando ano tras ano no Teatro Principal, coincidindo coas festas das letras galegas e de nadal, e na praza da Ferrería, pola Peregrina. Ademais ten actuado en varios auditorios e centros sociais de Galicia, en colaboración con concellos e coas deputacións de Pontevedra e A Coruña. A súa última actuación relevante tivo lugar no auditorio de Padrón o pasado mes de novembro co gallo do Festival de Santa Cecía.

Formada por trinta e dúas voces mixtas, está dirixida por Manuel Rey Lapido. A ilusión dos seus compoñentes é dobre. Por un lado, pasalo ben cantando toda clase de melodías e, polo outro, formar parte dunha das tradicións máis arraigadas de Galicia como é o canto coral

No concerto da casa de Cultura de Lérez deleitarannos co seguinte repertorio: “Popurrí galego nº 1”, arranxo de “Voces Amigas”; “Fisterra”, canción popular; “O muíño das aforas”, canción popular; “Os meus amores”, arranxo de “Voces Amigas”; “Morena” canción popular e “Popurrí galego nº 2”, Arranxo de “Voces Amigas”.

No intermedio, Esther Casalderrey e Chiruca García escenificarán unha selección de pullas, antigas retesías entre mulleres de Lérez e Mourente.

Para o próximo mes de febreiro a programación de “Venres Culturais Cedofeita” ofrecerá a conferencia de Germán Ermida que versará sobre o feísmo no urbanismo galego. Tamén terá lugar na casa da Cultura de Lérez, o venres, día 22, ás 20,30 h. Coma sempre, a entrada será de balde ata completar aforo.

Recital de poesía

Venres Culturais Cedofeita

Recital de poesía na Casa da Cultura de Lérez.

O próximo venres, 28 de novembro, ás 20,30 h., na Casa da Cultura de Lérez, a Asociación Sociocultural Cedofeita presenta un recital de poesía no que declamarán Carmen Blanco Rodríguez, Teresa Fraga Couto e Carlos Casalderrey García, os tres veciños de Lérez.

Carmen Blanco naceu no Castelo, emigrou a Venezuela e de volta rexentou unha taberna no lugar do Cimbelo onde vive actualmente. O seu interese pola cultura levouna a asistir a clases de adultos e diversos cursos, a participar en representacións teatrais como “Os vellos non deben de namorarse” e “O enfermo imaxinario” e á lectura de libros que, se cadra, non tivo oportunidade de ler de moza, sentindo unha predilección especial pola poesía. Nesta ocasión recitará poemas de Juan Ramón JIménez, Manuel María e un moi especial que a filla Maricarme lle dedicou o día do seu aniversario, que leva por título “A nena Carme, a avoa Carme”.

Teresa Fraga naceu en Santo André de Xeve, pero leva vivindo entre nós desde que casou en 1952. Traballou no campo, coseu para un almacén e vendeu nas feiras a roupa que ela confeccionaba. Ó xubilarse, comeza a realizar unha serie de actividades de lecer como ximnasia e teatro. Tivo éxito coa súa incursión no cine, non en van foi galardoada no IX Festival de Cans (2012) co premio do xurado á mellor interpretación feminina pola curtametraxe “Dúas Letras”, da que era a actriz protagonista. Actualmente canta no coro da igrexa. Na tarde do venres deleitaranos con poemas da súa propia autoría, que comezou a escribir como terapia fronte á desventura de quedar viúva. Son poemas cheos de sentimento e amor como “Din que se acaba o amor”, “Esa Mirada” ou “Vivencia”.

Carlos Casalderrey, aínda que vive en Pontevedra, non esquece que naceu no Arco. Ferreiro, mecánico e pintor, coñeceu o amargor e a dozura da emigración a Francia onde, daquela, comprobou a existencia dunha vida máis libre, digna e organizada. Carlos, amante do saber, é lector de novelas, ensaios históricos e poesía. Participou no grupo de teatro do centro social da extinta Caixa Galicia e canta no coro do Burgo. Con poemas de Cabanillas, Manuel María, Álvarez Blázquez e do portugués Eugénio de Andrade cerrará o recital que será seguido dun coloquio entre os asistentes.

A Asociación Cedofeita convida a todas as persoas interesadas na declamación a asistir a este evento entrañable, lembrando que, como é habitual nos “Venres Culturais”, a entrada será de balde ata completar aforo.

Pontevedra, 23 de novembro de 2014.

Presentación do nº 18 da revista CEDOFEITA

A asociación sociocultural CEDOFEITA de Lérez acaba de sacar á rúa o número 18 da revista do mesmo nome. A publicación, que conta con 64 páxinas, ofrece unha gran diversidade de artigos sobre diferentes temas.

No apartado de historia conta coa colaboración do historiador Anselmo López Carreira que escribe sobre a configuración da Galicia histórica, repasa os distintos avatares que a afectaron, tanto no territorio como na súa entidade política; un apartado gráfico con diversos mapas contribúe a unha maior comprensión do exposto no artigo. “Agricultores de Salcedo” é o título dun artigo de Xosé Álvarez no que se trata, polo miúdo, a historia da sociedade de agricultores desta parroquia pontevedresa dende os sucesos do Campo da Porta (1894) ata o golpe de estado de 1936; ademais dos feitos máis importantes da historia societaria achéganos nomes e biografía dos dirixentes máis destacados. Mario Gallego lembra aos mártires de Carral e conta como, a través da poesía e o teatro, se amosan os valores da chamada revolución do 46.

Isidoro González rememora un dos conflitos veciñais máis soados que tivo Lérez nos últimos anos: a carga policial contra os veciños no monte das Pías. Na orixe dos feitos estaba a postura veciñal de opoñerse ao paso da condución eléctrica para a depuradora de augas, en tanto non se cumprisen, por parte do concello, os acordos asinados con anterioridade.

O Suído é unha das serras máis representativas da nosa provincia, dotada de interesantísimos lugares de alto valor ambiental e paisaxístico así como etnográfico. Juan Soto adéntranos nas terras do Suído facendo un completo estudo dunhas construcións singulares como os chozos, utilizados polos pastores que coidaban o gando. O artigo complétase cunha espectacular serie de fotografías que completan o texto.

Benigno García preséntanos as vivencias dos anos da infancia coa relación entre os rapaces e a xunqueira; o seu artigo “Nós, os rapaces, e a xunqueira” é un compendio etnográfico sobre usos e aproveitamentos das xunqueiras, xogos e diversións, a pesca das anguías nas pozas, as entalladas, anécdotas, etc. Tamén sobre a xunqueira, pero centrándose nos aspectos ambientais e na súa consideración como espazo natural de interese local, o biólogo Vítor Cabaleiro cóntanos o estado actual da xunqueira do Alba ou da Gándara e analiza as diversas propostas existentes en canto á xestión de humedais.

O músico Juan M. Canosa achéganos un relato biográfico no que a música foi sempre o centro; a través do artigo van aparecendo orquestras e músicos que configuraron a Pontevedra musical dos últimos anos. Tamén ten carácter autobiográfico o espazo “De conversa” con Carmen Barragáns, unha loitadora da vida.

A xornalista Vera-Cruz Montoto escribe un documentado artigo no que analiza o Acordo Transatlántico de Comercio e Inversión (ACTI) e as regras do goberno mundial das empresas transnacionais; as consecuencias que para a cidadanía mundial poden ter as medidas derivadas do acordo están presentes nestas páxinas así como diversas referencias para que as persoas interesadas amplíen información. Eligio González dá a coñecer a figura dun dos máis importantes filántropos do contorno, o “indiano” Manuel Barreiro Cabanelas e a súa obra benéfico.educativa.

Teresa Fraga, veciña de Lérez, protagonista da curtametraxe “Dúas Letras”, revélasenos como escritora de poemas dos que nos achega unha mostra á que acompañan ilustracións de Montse Castro. “A Maleta” é un texto teatral de Manolo Ayán no que se retrata, de xeito desesperanzado a situación da xuventude na actualidade.

Completan o número seccións habituais como a de Humor, adicado ao “Ollomóbil”, Novos cultivos, actividades e un repaso ás exposicións de Cedofeita nos vinte anos da súa existencia.

O vindeiro xoves, día 25 de setembro, na Casa da Cultura de Lérez, ás oito e media da noite terá lugar a presentación da revista coa intervención de diversos colaboradores. O acto é de entrada libre ata completar o aforo.